ប៉េកាំង៖ យន្តហោះរបស់ក្រុមហ៊ុនអាកាសចរណ៍ China Eastern Airlines ដែលមានមនុស្សជិះលើយន្តហោះចំនួន ១៣២នាក់ បានធ្លាក់នៅតំបន់ភ្នំក្នុងតំបន់ក្វាងស៊ី ភាគខាងត្បូងប្រទេសចិន នៅពីថ្ងៃចន្ទ ខណៈកំពុងហោះហើរពីទីក្រុងគុនមីន ទៅកាន់ខេត្តខ្វាងចូវនេះបើតាមរដ្ឋបាលអាកាសចរណ៍ស៊ីវិលរបស់ប្រទេសចិន (CAAC) ។

ទូរទស្សន៍រដ្ឋចិន CCTV បាននិយាយថា យន្តហោះនេះជាយន្តហោះ Boeing 737 ហើយចំនួនអ្នកស្លាប់បាត់បង់ជីវិតមិនត្រូវបានគេដឹងភ្លាមៗនោះទេពេលនេះក្រុមជួយសង្គ្រោះត្រូវបានបញ្ជូនទៅកាន់កន្លែងកើតហេតុ។

CAAC បានបញ្ជាក់ថា យន្តហោះនេះបានបាត់ការទាក់ទងនៅលើទីក្រុង Wuzhou ក្នុងតំបន់ Guangxi ដែលផ្ទុកអ្នកដំណើរ ១២៣នាក់ និងនាវិក ៩នាក់នៅលើយន្តហោះ។

ទូរទស្សន៍ CCTV បានដកស្រង់ពីការិយាល័យគ្រប់គ្រងអាសន្នខេត្តថា ការធ្លាក់នេះ «បណ្តាលឱ្យមានភ្លើងឆេះភ្នំ»។

គួររំលឹកផងដែថា យោងតាមបណ្តាញសុវត្ថិភាពអាកាសចរណ៍ ឧបទ្ទវហេតុធ្លាក់យន្តហោះចុងក្រោយរបស់ប្រទេសចិនគឺក្នុងឆ្នាំ២០១០ នៅពេលដែលមនុស្ស ៤៤នាក់ក្នុងចំណោម ៩៦នាក់នៅលើយន្តហោះបានស្លាប់នៅពេលដែលយន្តហោះក្នុងតំបន់ Embraer E-190 ដែលហោះហើរដោយក្រុមហ៊ុនអាកាសចរណ៍ Henan Airlines បានធ្លាក់នៅពេលទៅដល់អាកាសយានដ្ឋាន Yichun ។

ក្នុងឆ្នាំ១៩៩២ យន្តហោះ China Southern 737-300 ដែលហោះហើរពីទីក្រុង Guangzhou ទៅកាន់ Guilin បានធ្លាក់ ដោយបានសម្លាប់មនុស្សទាំងអស់ ១៤១នាក់នៅលើយន្តហោះ នេះបើយោងតាមបណ្តាញសុវត្ថិភាពអាកាសចរណ៍៕